16‏/9‏/2011

منطق الثوار



·        قطعوا طريق صلاح سالم وكسروا عربيات الناس
* انت شوفت ده بعينك
·        لا... واحد صاحبى حكالى
* طيب والشرطة تضربهم ليهمن الاول
·        شتموا وكسروا وقطعوا الطريق
* وده مبرر ان الشرطة تفرمهم وتدهسهم بعربيات الامن المركزى  يبقى الشرطة متغيرتش
* انت ليك حد قريبك فى الشرطة
·        لا
* يبقى علشان كده ههههههههه
·        بقلك لا هههههه
* انت من الثورة المضادة ههههه
·        شكلك من بتوع التحرير
ــــــــــــــــــــــــــــــــــــــــــــــــــــــــــــــ
عندما يتحدث الثوار الى الناس لا يخلو الامر من الاستغراب الشديد بل والاستهجان من الطرفين .
والحل يكون بنظر كل طرف الى رؤية الاخر من نفس وجهة وفهم هذا الاخر للاحداث .... والامر ليس سهلا
فهنا نحتاج الى التحرر من رؤانا ومواقفنا وافكارنا – ولو مؤقتا -  وصبرا كثيرا كثيرا ... وهو ما لا يحدث بالمناسبة
ولكن  اعتقد انه الحل الوسط للتحاور بين الثوار وغيرهم
واعزونى فى استخدام تعبير " الثوار وغيرهم " رغم اننا خرجنا من التحرير ونحن نحمل الامل الكبير فى غد يتعاون فيه كل الشعب – ثوار وغيرهم – مع استبعاد القلة الملوثة والتى لن تتنازل عن تلوثها اطلاقا .
نعود الى منطق الحوار :
نحن الثوار نعتقد انه لم يتغير شئ وان الامر ازاد سوءا ،،،،،،، كيف
بيت القصيد ان من فعل ليس كمن شاهد او تابع او نظّر للاحداث اقصد احداث الثورة
نحن قمنا بثورة ومن قام بالثورة ليس كمن تابعها فى الفضائيات بل ورفضها . الكل تابع التغطيات الاعلامية الحقيقة والملفقة  والكل قتلها بحثا و كلاما  ولكن نحن الثوار من عايش الخوف والجوع والجراح وفقدان رفقاء الميدان .
هذا بيت القصيد كما قلت  والنقطة المحورية فى الحوار مع الاخرين
فعندما نتحدث عن الاحداث الحالية نضع فى ذهننا اننا لم نقم بثورة ونسقط رئيس ونظامه لنفاجئ بنظام لا يختلف عنه فى شئ جوهرى .
خرجنا بثورة لنقيم بناء سياسى ديمقراطى لا ليغرر بنا باستفتاء وقوانين مجحفة للانتخابات بفكر نصف قرن مضى
خرجنا بثورة لنرى الحرية لا لنرى عودة اشد للطوارئ موجهة لنا فى الاساس
خرجنا بثورة لنحقق الكرامة لا لنرى جنودنا يقتلون داخل اراضينا والمجلس يصمت
خرجنا بثورة ليتوقف أمن الدولة عن بطشه لا لنرى تغيير اسمه فقط وبقاء افراده كما هم وبنفس فكرهم وعملهم
خرجنا بثورة لتتوقف الداخلية عن قتل الناس ظلما وعدوانا لا لنرى مزيد من القتل لصاحب توكتوك او سائق وقف فى عرض الطريق او حتى بسبب هتاف فى ماتش كورة اقل من العادى
خرجنا بثورة  من اجل اعادة توزيع الدخل وكبح جماح الفقر لا لنرى اموالنا تصرف على بناء و تسليح الداخلية ربما اقوى من ذى قبل
خرجنا بثورة لننصب حكومتنا لا ليختارها المجلس العسكرى
خرجنا بثورة من اجل حكم مدنى – مقابل للعسكرى – لا لنرى حكم العسكر مرة اخرى
خرجنا بثورة لانهاء سيطرة رجال الاعمال اللصوص والقوادين على الحكم لا لنرى حماية لهم فى السجون ومحاكمات هزيلة وحماية لاذنابهم فى خارج السجون يمارسوا بلطجتهم على الناس
مما سبق نرى نحن الثوار انه لا شئ تغير كثيرا وربما لا تغيير على الاطلاق
ولا نعلم ولا نستطيع ان نتوقع سلوك المجلس العسكرى غدا وليس بعد شهور مثلا
لذلك ننتقد بمرارة  فى حلوقنا الاحداث الجارية  ننتقد سلوك الحكومة والمجلس و سلوك الداخلية و سلوك الفلول
ونردد فى انفسنا – بألم – وعلى الملأ -بدهشة واستغراب – اننا لم نقم بثورة و نجاذف بحياتنا ونعيش الرعب والخوف ونضحى بالف شهيد و5 الاف مصاب حتى نرضى بالاوضاع الحالية .
اعبر هنا عن  منطقنا واطالب غير الثوار بتوضيح منطقهم شريطة ان يكون واقعى وله مبرراته ومقبول ونحن نعدهم بتفهمه من زاويتهم الخاصة
اذن اين منطق غير الثوار ؟؟؟؟؟؟؟؟؟؟؟؟

هناك 5 تعليقات:

بنوتة مصرية يقول...

انت عشان شرفت يومين فى التحرير هبقى صلاح الدين الايوبى ههههههه

بنوتة مصرية يقول...

بعيدا عن الموضوع ككل هعلق ع كلمة وحدة فقط منطق غير الثوار اللى هما مين بقى بالظبط الناس اللى مقعدتش فى التحرير ؟ولا اللى مخرجتش فى مظاهرة؟ ...

التعبير الاصح من وجهة نظرى هو" غير المدركين " مش غير الثوار لآن دى ثورة شعب مش مجموعة من الثوار

darien يقول...

منطق الناس الى ما خرجتش الى التحرير الناس خايفه على نفسها مش عايزين يشوفوا ايام 28وما تالها كتيير جدا عارفين ان الدخليه والفسدين الى فيها وفى قطاعات الدوله كلهااو ما يقال عليهم فلول هما الى لسه مسيطرين على البلد الناس كلهم فى مصر شافت الخوف والفقرونفسهم يشوفوا يوم فيه زى ما شرد ناس كتير فى البلد زى ما حرم بلدنا من انها تبقى احسن من دول كتير كانت اقل مننا وبقت دلوقى احسن وقبلنا بس احنا كناس يهمنها الامان وفينا عدم القدره على الصبر وزى ما بيقولوا بنتعلق ديما بأشايه حتى لو هتتكسر وتغرقناللاسف انا مع ان الى بيحصل ده كله تهريج وما حصلش حاجه غير انهم بيخوفوا الناس من بكره السياسه القديمه المستهلكه بش الشعب ده برغم كل شئ ذكى ومدرك بس خايف ديما على بكره هيلاقى الاكل ولا لاء فنرجع لنفس النقطه الى هيوفرى الامن عشان اعرف اكل واعيش همشى وراه ده يمكن منطق ناس كتير فى مصر وناس لا تعرف فى قانون الطوارئ ولا احكام عرفيه الناس يوم 28 لما عرفت ان الجيش نازل كانت فرحانه انت بتتكلم مع ناس ما تعرفش يعنى اه احزاب ناس كتير جدا فاكره ان الحكومه دى هى القسم المنطقه الى تابع ليها الناس عاشت سنين فى خطه تغيب العقل لما حصلت الثوره ناس كتير اتهزت نفسيا ما بقتش فاهمه ليه ما احنا عايشين كويسين هما العيال دى عايزين ايه ما الراجل معانا بقاله 30 سنه عرفينه وعرفنا وهو احنا هنلاقى احسن منه ياله احنا اتعودنا حتى على قرفه هيبلونا بقرف غيره ليه ده منطق الناس منطق الى كان عايش ومايعرفش ان فى احسن من كده بمراحل وانه من حقه يعيش حياه افضل واحسن

شمس العصارى يقول...

اهلا ايه
هههههههههه
وفيها ايه لما اكون حفيد صلاح الدين
غير الثوار اللى هما مش راضيين عن الثورة ولا الثوار وبينتقدوا كل حاجة احنا بنعملها وفاكرين اننا بكده ضد مصلحة مصر بس احنا فاهمين انهم بيحطوا مصلحتهم مكان مصلحة مصر
ومينفعش نقول عليهم غير المدركين لانه لو غير مدرك الكلام والواقع كفيلين باقناعه و جعله مدرك لكن اللى بيعارض علشان مصلحته اضرت مينفعش اقول عليه غير مدرك
وبالمناسبة فى ناسس كتييييييييير لا راحوا التحرير ولا خرجوا فى مظاهرات لكن مع الثورة ومع الحق وضد النظام السابق وظلمه
زيارة جميلة يا ايه

شمس العصارى يقول...

اهلا دارين
يبقى منطق الناس دى انه كان بلاها ثورة من الاول وكنا عشنا فى السكون الهش وقبضة النظام السابق
احنا مكناش عايشين فى امن قبل كده هى الناس نسيت لما كانت تجرى لما تشوف بوكس شرطة هى الناس نسيت ان اى جريمة كان بيعملها عيل حد كبير كانوا بيجيبوا شاب غلبان يشيلوه القضية
احنا مكناش لاقيين العيش قبل كده ولا الناس نسيت كام واحد مات فى طوابير العيش
من 3 سنيين حصلت ازمة اقتصادية والغلاء زاد محدش قال للنظام ليه فين الاستقرار وفين العيش ... لا ساعتها كله خرس
بعد 8 شهور على الثورة وبعد ما بانت الحقايق وان الشرطة هى اللى فتحت السجون وظباط الشرطة هما اللى قتلوا الناس وسرقوا كمان وان الاعلام زور علشان يرعب الناس المفروض دلوقتى الناس تكون فهمت وعرفت الشرطة بوضعها الحال حتعمل نفس اللى عملته قبل الثورة واثناءها
يمكن اللى بيتكلم عن مخاوف بعزره ونقول انه غير مدرك لان فى ناس كتيييييييير بتشوه الثورة وعاوزة تقول للنا ان الثورة هى سبب كل المشاكل اللى انتوا فيها وعاوزين يلتفوا على اهداف الثورة علشان مصالحهم ونهبهم وسرقته متضرش
ولان لو الثورة حققت كل اهدافها يبقى اكيد مصر حتطهر منهم ومن اصحاب الثورة المضادة
زيارة عزيزة يا دارين بس مفيش كيلوا فاكهة تدخلى بيه علينا بعد الغيبة دى هههههههه