١٣‏/١٠‏/٢٠١٠

كله كله كله الريس



بيقلك واحد راح يشترى طماطم لقاها غالية ومشتراش فقال " الله يحرقك يا محسن " ، راح يشترى عيش ملحقش ياخد  فقال " الله يحرقك يا محسن " ، راح يشترى انبوبة فملقاش بوتاجاز فقال " الله يحرقك يا محسن " ، قام مخبر  سمعه فى كل مرة فاخده ورماه فى امن الدولة جيه الظابط بيقول للمخبر وده تهمته ايه رد المخبر " مش عارف اسم الريس يا باشا " ههههههههههههههههههه
المهم : هوجة وشوطة زادت اليومين دول كل الى عاوز يعمل حاجة يقرنها بالريس ... كلاما او صورا .... طبعا لان رؤية الريس بعيدة عن " ................ لا مؤاخذة " .
يعنى واحد داخل الانتخابات يقوم يعلق صورته وبجوارها صورة الريس ، لا ادرى هل يستخف بعقل البسطاء ليفتكروه " واصل " ام انه ينافق المسئولين -لان الريس عمره ما حيشوف اعلانه ده- ..... او ربما الاتنين معا .
واحدة مرشحة فى قنا بتقول ان كلامها عجب الريس فقامت مرشحة نفسها فى الانتخابات  وعلى قائمة الوطنى كمان – شوفوا مؤهلات المترشح -  لا وبتقول ان كل الى بيشوفها يقلها " انتى الى قابلتى الريس " .
واحد بتاع فراشة  يقوم معلق صورة الريس طب انا ساعات بغلط وبقول ان الفراشة دى بتاعة الريس – الله ... مش كل حاجة فى البلد دى بتاعته هو وابنه – بس براجع نفسى وبقول هل معقولة الريس يسيب شرم الشيخ وحفلات ايطاليا ويحضر سبوع ولا طهور ولا حتى ليلة " لاهل الله " ما علينا .
امر على عمارات كتير فى اكتوبر تحت الانشاء القى صورة الريس وابنه ... فاحتار  العمارات دى بتاعة مين فيهم الريس ولا ابنه .
بس الناس دى اغبية – لا مش الريس وابنه – الناس اللى حاطة الصورة لان كل الى حيبص للصورة ويقرا اللى عليها حيفهم ان الصورة مكتوب عليها "الفكر الجديد والانطلاق للمستقبل "  ايماءا لابن الريس وبالتالى ابو ابن الريس – حلوة دى علشان الرقابة هههههههههههه- يبقى فكره قديم وعفا عنه الزمن ومقدرش يعمل انطلاقة لمصر ولا قدر يخرجها من عنق الزجاجة على راى سهير البابلى يبقى الناس دى بتسئ  للريس وده ميصحش يا جدعان ده برضه مهما كان الريس وده اللى وعينا عليه وبعدين محدش عارف يمكن نموت احنا  وهو لسه عايش مش هو " مبارك العمر " .
واوقات تشوف  اعلان لمحل وصورى الريس جنب صورة صاحب المحل ... تقلش شريكه يا اخى .... بس ارجع واقول هو الريس فاضى من التخطيط للبزنس الكبير ويشارك " صاخب المخل " ..... مش ممكن يا جدعان .
طب احنا اتعودنا على الجيش والشرطة والوزارات والهيئات يعلقوا صور الريس ادام الله وجوده وبقاءه حتى  وصولنا لكأس العالم 2086 ... لكن الناس العاديين  بيعملوا كده ليه ... يكنش علشان ينافقوا المسئولين .... طب يكنش المسئولين بيتعاملوا مع صورة الريس بنفس التبجيل مع شخص الريس .... يجوووووووووووز .... ده نظيف صرف  نص مليون علشان يعملوا صورة جديدة  بدلا من تلك التى داسها المحلاوية باقدامهم – فى مشهد لن ينساه التاريخ - .
وخد عندك عمر  ودياب لما غنى " واحد مننا " حيرنى معاه  .... الا مين هما مننا دول ..ولا مين هما اللى مش احنا طبعا ... يعنى دول احنا ولا الناس التانيين .... لا اكيد مش احنا لان ده منهم  واحنا ملناش دعوة  ... طب احنا مين ؟؟؟ مش بقلكم حيرة . المهم كل المظاهر دى بتدل وبتشير وتؤكد ان الريس " صاحب العزبة " .
على العموم ..................................... يا ريس
متفهمنيش غلط يا ريس انا بقول  " انى بحبك " بس فى سرى
واكيد اكيد " اللى يعوزه الريس كله كويس "  وكفاية عليك مشاغل الحى يا ريس
ايوه يا جدعان انا اقصد رئيس الحى هو انتوا فهمتوا انهى ريس بس ههههههههه متودوناش فى داهية يا جدعان   ده انا امى عاوزانى .
وبعدين مين قال انى مش بحب الريس ... طب ده من كتر حبى فى الريس  انا عاوز ريس تانى كمان بس ميكنش ابنه  . 
اخيرا " ليس هناك اسوء من اختزال وطن بالكامل فى صورة شخص واحد .... رغم ان الشخص يفنى والوطن باقى "  

هناك ١٥ تعليقًا:

eng_semsem يقول...

بصراحه الله ينور جبت من الاخر بس فعلا صورة الرئيس ده حصانه لكل واحد شايلها وحططها على مشروعه ولو قدام فرح او طهور يبقى الحكومه تيجي تنوره مش تهده وتلم الدور ربنا يخليه لينا حامينا حتى بصورته يعمل ايه تاني عشان تردوا عنه يا جدعان

ليلى الصباحى.. lolocat يقول...

ههههههههههه
السلام عليكم
والله ما قادرة اكتب ههههه
اضحك الله سنك فعلا شر البلية مايضحك
بس قول الحق مين محسن ده ههههه
فكرتنى بصلاح جاهين
ربنا يجعل كلامنا خفيف عليهم
انا قاصدى محسن مش حد تانى هههه

لو الاوجاع بتتكلم مش هيكون اجمل من كلامك هنا
الحمد لله اننا بنقدر نحول اوجاعنا لنكتة والا كنا نموت من كل خبطة على راسنا

أسأل الله ان يكشف الغمة ويرفع عنا البلاء

والله اخى البلاء حل بكل العالم هذا تصديق الاية الكريمة (اتقوا فتنة لاتصيبن الذين ظلموا منكم خاصة)


فليرحمنا الله
تحياتى لك ولمحسن

شمس العصارى يقول...

مهندس اسامة : اهلا بك نورت المدونة
ما احنا راضيين عنه اهه وزى الفل ههههههههههههههههه
انا مش قلت بحبه وبموت فيه ومن بكره حشيل صورته فى المحفظة هههههههههههه
اعتقد يا اسامة ان سبب ده هو ان كله عاوز يثبت ولائه للريس علشان ياخد ثقته ويهبش ويمشى مع الموجة
يعنى كله كله كله بيخدم الريس والريس فقط
مشكور اسامة على المرور و التعليق
اول زيارة للمدونة وياريت متكنش الاخيرة

شمس العصارى يقول...

لولو : اهلا اهلا نورتى
مين محسن ده هههههههههه وحياة الاخوة ما اعرفه
على فكرة مش انا الراجل الى راح يشترى طماطم ده هههههههههههههههه
فعلا معاكى حق لولا اننا بنحول همومنا لنكات لقتلنا الهم
" لو الاوجاع بتتكم" حلوة الجملة دى
نعم البلاء لا يستثنى الا " الذين ينهون عن السوء"
رحمنا الله جميعا
تحيات مقبولة ولكى اكثر منها
بس تحياتك لمحسن قوليهالوا بنفسك .. ما انا قلتلك معرفهوش يا ستى ههههههههههههه

غير معرف يقول...

صباح الخير سيادة الرئيس
و نشكركم على الدعم
قصدي رئيس تشيلي طبعا

فارس عبدالفتاح يقول...

السلام عليكم اخي الكريم


اولا : انا قد علقت في الموضوع السابق رداً على سؤالك وليس لاني لم اقرأ الموضوع وقرأت العنوان فقط فانا اريد ان اعلمك شيء حقيقي في شخصيتي انا لا اعلق على شيء لا اقرئه جيداً وافهم ما فيه جيداً وكان النص الاتي من كلامك هو ما دعاني ان اعلق :

يقولون ان اسؤ نتائج حرب اكتوبر فى المجال الاجتماعى ان من ضحى بحياته او خاطر بها لم يستفد باى شئ من المكاسب التى تلت الحرب وخصوصا اجتماعيا واقتصاديا


انتهى ...


فجلست افند بعض الاحداث التاريخية لهذا العصر وحاول عن طريق الترميز او الاشارة الى اتجاه سياسة النظام في ذلك العصر ،، والتي ورثها للنظام الذي تلاه .


فانه اذا اتفقنا على ان نظام عبدالناصر قد اورث لنظام السادات مشكلة احتلال الاراضي في 1967م، التي لم يتخلى عنها عبدالناصر واقسم على تحريرها من اول الجولان الى الضفة الغربية الى سيناء وعدم الرضوخ للاسرائيليين فلا تفاوض مع اسرائيل ولا صلح مع اسرائيل ولا اعتراف باسرائيل وخاض معركة من انبل واشرف المعارك في بناء القوات المسلحة من القاعدة للقمة وبناء المشاريع الانمائية مثل مجمع الالمونيوم واستكمال بناء السد العالي ومصنع البتروكماويات والحديد والصلب والانتاج الحربي وغيرها .

وكل هذا تبلور في بيان 30 مارس التاريخي .


فقد تخلى نظام السادات عن هذه المبادئ وسلم اسرائيل كل شيء وان حرب اكتوبر انما كانت عملية تحريك الازمة ولتسويتها وليست لاسترجاع النصر الضائع .

ولقد سلم السادات كل شيء استرجع سيناء بلا سيادة حقيقية ومشرفة لدولة كانت مستقلة ولها سيادتها .

وسلم الجمهورية العربية المتحدة بشعبها والشعوب العربية جمعاء للاميركان والاسرائيليين يرتعون فيها بطائراتهم وسفنهم الحربية ودباباتهم ..

المهم :

كان من واقع تسألك انك لا تعلم هذه الامور فاردت ان اضع هذه الاشارات والرموز لكي تبحث بنفسك عن الحقيقة.

ولم ارد ان اقيم ميزان قيمة بين عصر عبدالناصر وعصر السادات ،، فليس هناك وجه مقارنة بين الثريا والثرا ما بين الحقيقة والزيف ما بين الجوهر والعرض .

فالمشكلة ليست مشكلة مقاتلين او شهداء المشكلة مشكلة امة وتاريخ وكرامة مستقبلة وحاضر .


وسوف اجيبك على هذا السؤال الذي طرحة مع اني اعتقد انه غير دقيق وذا طابع تشكيكي في شيء لا يقبل التشكيك على الاقل بالنسبة لاي عربي ومسلم صاحب كرامة وعزة حقيقية .

نعم كان سيقاتل الجنود وبضراوة اكثر مما كانوا يقاتلون بها في اكتوبر لماذا .

حتى لا يحققوا اغراض العدو فيهم وكانوا سيعارضون سياسة السادات في الصلح من الاساس وكانوا سينقلبون على السادات ولربما كانت ستكون ثورة حقيقية على السادات وعلى نظامة وعلى طلب تسوية القضية العربية مع اسرائيل ،، وكانوا سيرفضون مقول ان 99% من اوراق الحل في يد اميركا .

وكانوا سيقاتلون الى اخر قطرة في دماءهم ولن يسلموا .

فارس عبدالفتاح يقول...

على فكرة نسيت اقول لك حاجة مهمة هي :

ان الاشتراكية الناصرية تختلف اختلاف كامل عن الاشتراكية الماركسية تماماً من اساس فلسفتها وبالحتمية نتائجها .


وكثيراً من الشباب من يخلط بين الاثنين .. كما يحدث الخلط بين القومية العربية والبعث العربي .


وهذا ناتج ونابع من القاعدة المعرفية الغير سلمية والغير صحيحة لاصول الافكار والايديولوجيات والنظريات .

فهناك اختلاف جوهري بين الفلسفة الاشتراكية الماركسية والاشتراكية العربية وكذلك القومية العربية والبعث العربي .

فاذا كنت تعلم هذا ، فهو المطلوب اثباته ، وان كنت لا تعرف فابحث عن الاجابة بصدق والحزم .

مع اطيب التمنيات

فارس عبدالفتاح .. قومي عربي

جايدا العزيزي يقول...

هههههههههههههه

حلوووووووه اووووووى النكته

بحب النكت الساخرة

ونشرت موضوع فى القسم السياسى عندى

بخصوص النكت

موضوع فى الصميم

ايه رائيك احط صورة الريس على المدونه

ههههههههههههههههه

اصل انا كمان بحب الريس

بس اولادى عيزنى

احمد فؤاد نجم قال شعبى حبيبى

ونؤيد سيادتك


ماهو احنا بالزوق بالعافيه نؤيد سيادته واولاد سعادته

اشكرك

تحياتى

Kontiki يقول...

شعب اتعود على قلة الكرامة و مسح الجوخ

شمس العصارى يقول...

دكتورة ايمان : اهلا بكى دائما
قرات اول سطر من تعليقك وقلت اكيد بتتوقعلى ان ابقى رئيس فى يوم من الايام
وعلى طول فكرت انى اعطيكى منصب وزير الصحة
وبعدين لقيتك بتقولى رئيس تشيلى
خلاص روحى امسكى وزير صحة فى تشيلى بقا ههههههههههههههههههههه
لا شكر على واجب يا فندم
دوما تعليقك واسمك يزين الموضوع

شمس العصارى يقول...

ا/ فارس عبدالفتاح : اهلا مجددا
سؤالى كان افتراضيا للدلالة على ما فعل الشهداء والمقاتلين ومن حالنا اليوم
هل تصح احوالنا الحالية بالرغم من الدم الذى بذلونه هؤلاء
وانا استخدمت فى سؤالى " لو " وهو حرف امتناع لامتناع
ثم ان من مات فى الحرب اغلبهم جنود ... اى نعم كان هناك صف وظباط استشهدوا لكن الاغلبية كانوا جنودا وهؤلاء لا يملكون حق الاعتراض مطلقا
القادة والظباط الذين حاربوا - دون البخس منهم او الانتقاص منهم ولكن فقط للرد على تعليقك - هم نفسهم الذين لم يعارضوا السادات فى كل ما فعل ... اذن كيف تقول انت ان من استشهد كان يقدر على الثورة على السادات
مشكور على ردودك وتوضيحاتك
وجميل كلامك عن الاشتراكية
انا غير ملم سوى بالافكار الاساسية للاشتراكية واغلبها من قرائات فى غير صلب الاشتراكية نفسها
لكنى سوف اقرا عنها من مصادرها باذن الله
شكرا على دوام مرورك

شمس العصارى يقول...

جايدا : اهلا بكى
يعنى انتى تحطى النكتة فى القسم السياسى عندك ... وانا اتحبس هههههههههههههههههه
لا طبعا انا انصحك انك تحطى صورة الرئيس فى مدونتك وتكتبى كمان " نؤيد ونبايع الى يوم القيامة "
وربنا يخليلك اولادك ويباركلك فيهم
نؤيد سعادته وسعادة ولاده وسعادة احفاده كمان مش هى عزبة هههههههههه

شمس العصارى يقول...

كونتيكى : اهلا بكى
"شعب اتعود على قلة الكرامة و مسح الجوخ"
كل الشعب يا كونتيكى ... حتى انا ههههههههههه
مش كل الشعب يا كونتيكى انا اسمى هذه الفئة بال" الطبقة المستفيدة من الوضع الحالى "
وعندهم استعداد يبوسوا جزمه والتراب الى بيمشى عليه علشان مصلحتهم وسرقتهم
يوما ما سيحاسبون وينتقم الشعب منهم
مرور جميل يا كونتيكى داومى عليه

غير معرف يقول...

انا معجبة جدا بجهود وزير الصحة و وزير التعدين في تشيلي. بيفكروني بمصر و الاهتمام بضحايا العبارة تمام بس بالعكس.

Unknown يقول...

حلوه قوي و النكته تحفه تعرف أنا مره شوفت تاكسي حاطط صورة الريس و مفهمتش ليه بس حسيت ان الناس مبقتش بتفكر غير في لقمة العيش و مش عايزين مشاكل...هم يضحك و هم يبكي