٣‏/٤‏/٢٠١٢

حملات دعم لمن يستحق


تقديم ابوالفتوح فى جامعة جنوب الوادى – قنا
السبت 31-3-2012
احيي هذه الوجوه النضرة ..... من 10 سنين كنت طالب فى هذه الجامعة لكن مكناش نقدر نتكلم فى السياسة ولا نقول راينا ولا نمارس اى نشاط سياسى لكننا كنا نقرأ انه من 20 سنة وقف طالب مثلنا اما رئيس الدولة ونصحه بكل شجاعة وجرأة وكنا مستغربين ونقول جالته منيين الشجاعة دى كلها وازاى اتحمل . ولكن بعد 30 سنة من هذا الموقف تشاء الظروف انى ارافق هذا الطالب الى الجامعة نفسها بوصفى احد افراد حملته الرئاسية و بوصفه رئيس مصر القادم طبعا الدكتور عبدالمنعم هو ذلك الطالب او هو رئيس مصر القادم .
الحقيقة ان اجتماعنا وكلامنا بحرية الان بفضل المناخ اللى ادتهولنا الثورة .... فمن لم يشكر الثورة لم يشكر الله .
بعد التنحى مباشرتا كنا بنبص لقدام بنبص على مصر قوية وعظيمة وكنا مدركين ان ده مش حيتحقق الا بمشروع وطنى وحضارى يقوم بيه شعب مصر ويكون على راس هذا المشروع رئيس الدولة وكنا حاطين اشتراطات لمنصب الرئيس لا يختلف عليها 2 بيفكروا لمصلحة مصر كنا مشترطين ان رئيس مصر القادم ميكنش من النظام البائد ولا كان جزء منه ولا عمل معه وكنا مشترطين ان رئيس مصر ميكنش تبع حزب علشان حزبه ميطغاش فى الحياة السياسية ولازم الرئيس يقدر يقدم خطاب تطمينات للعالم بما يحفظ مصالح وكرامة مصر لاننا ذهقنا من زمن الانبطاح عمله النظام المخلوع . عاوزين رئيس يقدر يجمع الشعب المصرى  بكل تياراته وميفرقش ويكون مقبول من كل التيارات عاوزين رئيس يكون جرب الظلم زيه زى الشعب المصرى علشان يحس بالشعب فعلا مش بالكلام
عاوزين رئيس ليه تاريخ نضالى معروف انحاز فيه للحق والعدل والشعب عاوزين رئيس يقدر يدير دولة بحجم مصر كل الاشتراطات دى موجودة فى شخص واحد بس هو الدكتور عبدالمنعم ابوالفتوح . ابوالفتوح افضل شخص فى مصر الان يكون على راس المشروع الوطنى ويساعدنا على تنفيذه
الحقيقة ان ابوالفتوح اكثر من مجرد شخص يترشح للرئاسة . ابوالفتوح قيمة وطنية ثابته ومستقرة من حوالى 40 سنة ابوالفتوح رائد العمل الطلابى فى السبعينات ابوالفتوح رائد العمل النقابى فى الثمانينيات . التسعينيات فترة صبر وعزيمة وثبات على الحق ووقوف فى وجه نظام ظالم مستبد ابوالفتوح رائد العمل الاغاثى فى العقد الاول من الالفية التانية وان شاء الله رئيس مصر فى العقد التانى من الالفية .
يوم 25 يناير 2011 كنا بننقول عيش حرية كرامة انسانية ابوالفتوح كان فى اليوم ده عند دار الحكمة بيخطب فى الناس وبيطالب زيهم بالحرية يوم 25 يناير 2012 كنا بنقول اننا مش حاسين بالتغيير وبنكمل الثورة وان مطالبنا هى هى عيش حرية كرامة انسانية ابوالفتوح كان معانا فى مسيرتنا عند ميدان مصطفى محمود وطول سنة كاملة بين اليومين مفتقدنهوش خالص بالعكس كان معنا فى كل مراحل الثورة كان بيدعم المستشفيات الميدانية ويعالج فيها بنفسه فى ال18 يوم الاولى للثورة وكمان اراء واضحة وصريحة فى كل جمعنا ومطالبنا زى المحاكمات وحقوق الشهداء ولاسراع بنقل السلطة للمدنيين وانا مش حنسى ايام اعتصام احداث محمد محمود لما الدكتور جيه وقعد معانا فى الخيمة كاى مصرى خايف على بلده .
ابوالفتوح اتعلمنا منه قبل ما نشوفه اُمال لو متعلمناش من  القيمة الوطنية الكبيرة حنتعلم من مين من رئيس وزراء موقعة الجمل مثلا ولا من نائب رئيس مخلوع كان بيهددنا ويتوعدنا ويقلنا ميدان التحرير لازم يفضى والحوار او الانقلاب ولا نتعلم من وزير خارجية فى عهده كانت بداية التخطيط لبيع الغاز لاعدائنا كل الاشخاص دى الى زوال وتبقى القيم الوطنية الاصيلة كشخص الدكتور ابوالفتوح
وانا بعمل توكيل لابوالفتوح فى اكتوبر واحد شاف الورقة ولما لقى مكتوب عليها قنا قالى ايه ده  من قنا وعامل توكيل لابوالفتوح قلتله وايه الغريب قلى معروف ان قنا والصعيد يعنى ممكن يرموا على حد فلول قلتله شعب قنا اوعى من كده بكتير ومش ممكن يدى صوته لاحد من الفلول يعامله بالقبضة الامنية زى ما المخلوع كان بيعاملنا ويهمشنا ويهملنا شعب قنا اسقط الفلول فى الانتخابات البرلمانية واكيد حيسقط الفلول فى الانتخابات الرئاسية ان شاء الله " صح ولا لأ يا شباب " .
الموضوع بالنسبالنا مش مرشح رئاسى وانتخابات فقط لالا ده بالنسبالنا استكمال لاهم مراحل ثورتنا العظيمة وهو بناء نظام ديمقراطى وتنصيب رئيس مدنى وحيكون ابوالفتوح ان شاء الله  علشان مصر تحقق مشروعها الوطنى
رحبوا معى برئيس مصر القادم الدكتور عبدالمنعم ابوالفتوح .
 * هذا التقديم لم يتم لاسباب تنظيمية *

هناك ٦ تعليقات:

غير معرف يقول...

بالتوفيق

Wohnungsräumung Wien يقول...

اللهم ولى من يصلح

شمس العصارى يقول...

دكتورة سونيت .... اهلا اهلا اهلا
وحشتنا تعليقاتك وتشجيعاتك
بس للاسف التقديم لم يتم
علشان التقديم يتم كان لازم حد من الطلاب والموظفين واعضاء هيئة التدريس يتكلم ومكنش فى وقت اساسا
مرورك بيسعدنا

شمس العصارى يقول...

Wohnungsräumung Wien اهلا بك
امين يارب
مرورك جميل

Räumung wien يقول...

فين الموضوعات الجديدة .. ؟؟

Übersiedlung Wien يقول...

شكراً لكم ع الموضوعات المتنوعة ...