5‏/2‏/2011

لازم تنزل التحرير

تحديث: اقسم بالله انا ما كنت ناوى اتكلم ولا احكى  وكفاية انى منزفتش زى الشباب الطاهر اللى شوفته 
لكن بعد ما قريت شوية والناس اللى قابلتنى سالتنى عن حقيقة الفلوس والوجبات وزهلت لما لقيت ان الشعب فى مجموعه مصدق افتراءات التليفزيون الحكومى القذر واللى بيشوه صورة ارجل شباب مصر  ...... والله العظيم انا بكيت لما قارنت بين كلام المعتصمين على الشعب وانه معاهم وبيساندهم وكلام الناس اللى بتشكك فيهم 
انا شوفت ناس جاية من دمنهور وكوم حمادة والشرقية وبنى سويف وقنا وسوهاج ومراكز الجيزة والفيوم كلهم حماس وصبر ... اسر كاملة بتبيت فى العراء ... السيدات اللى بتنام وهى جالسة وغفوة كمان البنات اللى بتساعد وتسقى الميه الشباب اللى بيحمى مداخل ومخارج الميدان الشباب المتطوع فى النظافة الناس يتقسم الساندوتش والبسكوتة عن طيب خاطر الحمام اللى دخوله بالدور والناس ملتزمة الحصار والبلطجية اللى هجموا علينا الشباب الشجاع اللى اتقدم واخد رصاص حى فى دماغه واستشهد ... كل ده كل ده يشوهوا صورته ويتهموه بالعمالة وانه بياخد فلوس ووجبات طيب ده السبت الساعة 8 الصبح الاذاعة الداخلية كانت بتقول ان اللى معاه اكل زيادة يجيبه علشان يوزعوه على المتطوعين كل ده وبعد كده الشعب المصرى يتهمهم بالعمالة وعدم الفهم 
طيب الناس دى فى ميدان التحرير ليه مش علشان يدافعوا عن شعب مصر ... مش علشان يغيروا مستقبل مصر ....... لا انا حكتب وحروى كل حاجة شفتها بعينى علشان حق الناس الشرفاء دول ميضعش وعلشان اغلبهم ملوش فى النت هناك كان اخرنا اخبار الجرايد وكنا بنضحك لما نقراها ونتندر ونقول طيب هما قالوا بالدولار ليه ميكنش باليورو ونضحك ... لكن اتصدمت لما لقيت الناس مصدقة الكلام ده 
حرام عليكم شباب واعى خرج يدافع عن مصر تشوهوا صورته باكاذيب 
كفاية سمعنا شتيمة واهانة من اذناب الحزب الواطى نلاقى كمان الناس مصدقة الكلام ده 
حرام عليكم ... منكم لله .... ربنا على كل من شوه او صدق افتراءات على المتظاهرين الشرفاء  ... كفاية ان الشعب نايم بقاله 30 سنة والشباب الشجعان دول غيروا فى اسبوع ما لم يكن يحلم به الشعب 
يارب انصر المتظاهرين واظهر الحق زى ما نصرتهم على البلطجية وهم قلة مستضعفين ... ثبتهم يارب وكملنا على خير ... يعنى يبقى شباب يتصاب وشباب يستشهد والناس تحت البطانية يتهكمون .... حتى مفيش كلمة شكر ولا عرفان ليهم 
روحوا روحوا ميدان التحرير وشوفوا بعينيكم ... الناس جات من قبلى وبحرى وانتوا نايمين على السراير وبتصدقوا الاشاعات 
يارب انت المطلع والعالم ،،،،
وححكيلكم عن ساعات الاربعاء الدامى  
ــــــــــــــــــــــــــــــــــــــــــــــــــــــــــــــــــــــــــــــــ
الثورة مش فيديوهات وصور وهتافات 
الثورة اعتصام  وحصار  والم  وجوع  ودماء وشهداء 
لازم تنزل التحرير وعلى الاقل تقضى يوم كامل هناك 
اللى فى ميدان التحرير " مستقبل مصر " واللى بيصنعه " شباب مصر " 
لا يوجد اى شعار لاى فئة او طائفة  هناك " مصر تتحدث عن نفسها " .... وفقط  
علشان تحس بمصريتك روح ميدان التحرير 

هناك تعليقان (2):

الدرويش المرووش يقول...

ربنا يتمها على خير

شمس العصارى يقول...

اهلا اهلا بالدرويش
ساف على تاخير الرد
بس انشغال دائم غصب عنى
المهم الحمد لله تتمها على خير وربنا تقبل دعائك
وربا يسهل ونعدى المرحلة الانتقالية بخير وبسرعة
اول زيارة للمدونة وياريت متكنش الاخيرة
شكرا يا درويش الا انتى بتشجع الاسماعيلى ههههههههههههه