١‏/٤‏/٢٠١١

تحرير غير التحرير " ذكريات حلوة .... وكتير مش حلوة"



ذكريات حلوة .... وكتير مش حلوة
النهاردة نزلت التحرير فى جمعة المحافظة على الثورة العدد كان قليل يعنى حوالى نصف مليون عدد كويس بالنسبة لليوم لكنه قليل بالنسبة لى والذى اعتدت ان احضر فى ميدان التحرير بصحبة الملايين
دى اول مرة انزل التحرير منذ اخر يوم تركته 12/2/2011 وخلال الشهرين اللى فاتوا مكنش ليا نفس ادخله خالص بسبب ذكرياته معى  لدرجة انى مرة بعد ما وصلت للمتحف رجعت ولفيت من ناحية الكورنيش وده كان من حوالى شهر
بعد شهرين من الثورة لا استطيع ان انسى مشاهد الاربعاء الدامى وخصوصا ليلة الخميس المرعبة وما كان بها من قتل وشهداء شفناهم باعيينا ..... كنا دايما بنشوف احداث غزة فى التليفزيون ولكن فى الاربعاء بالليل عشناها وعايناها بس كان فى التحرير مش فى غزة .
المهم حاولت بقدر الامكان النهاردة انى اتجول فى كل انحاء الميدان – كعادتى – وكنت بحاول افتكر كل حدث او موقف او اى شئ حصل فى الاماكن  دى اثناء تواجدى فيها فى اول اسبوع لاعتصام التحرير
كنت – ولا زلت – عند رائىّ القائل بان التحرير فى اول اسبوع يختلف عن التحرير فى اى اسبوع اخر
اول اسبوع هو معنى الاعتصام الحقيقى اللى هو انك تعيش الخوف والجوع والشتيمة والضرب والاصابات والبرد وزيادة تشوف الشهداء وهما بتساقطوا قدام عينك .
اما باقى اسابيع التحرير فهى احتفالية حتى قبل التنحى ولا ابالغ اذا قلت ان تلك الوجوه التى حضرت اليوم غير تلك الوجوه للمعتصمين فى الايام الاولى ........ وازيد واقول ان اغلب المعتصميين الحقيقيين  - وخصوصا اول اسبوع – لم يرجعوا الى الميدان بعد ما خرجوا منه يوم 12/2 وخصوصا ان فيهم ناس كتييييير من خارج القاهرة واعتقد انه من المستحيل ان نجمع حتى ربعهم  فى مكان واحد الان حتى لو كان التحرير
تجولت فى الميدان وصليت فى عمر مكرم العصر والمغرب كالعادة طبعا كان زحمة بس زحمة مش حلوة بعكس زحمة الاعتصام الاول واللى كانت زحمة منظمة ودورة المياه والوضوع بالدور والكل راضى والاغلب متعاون
بالمصادفة وانا خارج من عمر مكرم افتكرت انى كنت لابس نفس الحذاء ونفس السويت شيرت – اللى حيلتى ههههه- ونفس السويتر بس البنطلون الوحيد اللى كان مختلف وكان الصدفة الجميلة  انى ارجع التحرير بنفس اللبس تقريبا هههههههه
والصدفة الاجمل فعلا انى انا وخارج من الجامع واحد ادانى بلحة ياااااااااااه نفس اللى كان بيحصل فى الاعتصام ... شكرا لترتيب القدر
لفيت الميدان كله الا ناحية شارع طلعت حرب مقدرتش اروحه بصيت عليه من بعيد
ياه فى احداث كتيرة وتفاصيلها كنت نسيتها وافتكرتها وانا بتمشى فى التحرير
الاماكن اللى كنا بنقعد فيها والبقسمات اللى اتوزع علينا او البسكوته اللى اتقسمت على اتنين او السندوتش اللى يجيلك متعرفش ازاى فعلا كانت بتحصل الواحد يكون جعان ومش عارف يعمل ايه يلاقى سندوتش جاله سندوتش فول على اى حال هههههههههه مش كنتاكى
اماكن الهتاف وكلماته واماكن السمر والرقص على الاغانى الوطنية هو مش رقص كان تنطيط وخلاص بس حاجة تنسى وتجدد المعنويات شوية والضحك بالليل حتى فى اصعب الاوقات خرجت من ناحية المتحف كما دخلت بس نسيت ابص على عمارة 9
ححاول افتكر الاحداث واكتبها او اسجلها صوت علشان اخليها ذكرى سيئة فى تفاصيلها لكنها جميلة جدا فى نتيجتها

هناك ٦ تعليقات:

جايدا العزيزي يقول...

معاك ان كانت هناك احداث سيئه ولكن النتيجه كما ذكرت جميله

طبعا العدد كان قلبل لانها جمعه اليتيم\\

ولكن كلنا معا متحدون ومصممون ان نكمل المسيرة

اشكرك

تحياتى

Unknown يقول...

عبد الكريم السلام عليكم و رحمة الله و بركاته
أولاً بعتذر عن تقصيري معاك و مع الجميع لظروف عودتي للعمل و من قبلها لأني كنت بتحاشى الحوارات السياسيه شوية.
سعيده انك بخير و شئ يدعو للفخر انك حضرت الأيام الرائعه و الجو النادر ده أتمنى أن الأجواء المنظمه الحماسيه المتوحده دي ترجع تاني و تتعمم في مصر كلها.
الذكريات مهما كانت مؤلمه لكن في النهاية أكيد انت فخور بنفسك و ان شاء الله الجاي واجب علينا كلنا اننا نحافظ على الثوره و دم الشهداء و المصابين.
تحياتي ليك و أتمنى تكون بأحسن حال.

شمس العصارى يقول...

جايدا ..... اهلا بيكى
لا ملوش علاقة يوم اليتيم بالعدد القليل
طيب اقلك هما كانو عاملين احتفال بيوم اليتيم قدام المجمع وكانوا بينادوا على اطفال الشهداء ييجوا يحتفلوا ويغنوا
ولا اعتقد ان الكل متحد ودهه بان قوى خلال الفترة اللى فاتت وظهر بوضوح فى جمعة الانقاذ
ربنا يسهل والمسيرة تكمل على خير
شكرا لمرورك وتعليقك الجميل

شمس العصارى يقول...

شيرين ... اهلا منورة
وعليكم السلام ورحمة الله وبركاته
لا داعى للاعتذار المشاغل والحياة اوقات بيعصفو بالناس .... عن نفسى مكنتش متابع الفترة اللى فاتت كلها ههههههههههههههههه
هو فعلا جو نادر وجدا كمان وكانت ايام رائعة بالرغم من صعوبتها وقسوتها
ياريت النظام اللى كان فى التحرير فى بداية الثورة يكون فى كل مكان فى مصر ... لكن فين بس الكلام ده
فى التحرير كان فى حراسة وتفتيش ونضافة وطوابير وتعاون وتحاب ومشاركة مع الناس اللى عمرنا ما شفناهم فى حياتنا وللاسف ممكن منشوفهمش تانى
اصعب شئ موضوع الشهداء دول
يعنى انا لما بشوف النخبة والسياسيين والناس اللى بتنزل التحرير تحتفل واوقات تختلف لما بشوف دول بقول ان كل ده بيحصل علشان فى ناس ماتت واستشهدوا اتقدموا علينا بخطوات وتلقوا الرصاص الحى بدالنا
يارب الجاى يكون احسن
دمتى بخير وبدون انشغال

ليلى الصباحى.. lolocat يقول...

السلام عليكم ورحمة الله

ايام الثورة عدت علينا كلنا كأنها حلم
انا كنت من الناس اللى بتقول هتكون مجرد مظاهرة ادية زيها زى غيرها وبصراحة لم اتقوع النتيجة ابدا

نزل اخويا وبابا من اول يوم قلت اشوف هيحصل ايه ...طبعا خدوا اللى فيه النصيب من اصابات و((ضرب )) لكن ربنا سلم الحمد لله نزلت يوم واحد بس لكن عنيك ماتشوف الا النور (( كنت )) هفطس منهم هههههههه

بس كانت ايم طيبة وكلها حماس و احساس جميل بالاتحاد ومفيش حد كان يهمه ده اسمه ايه لكن كلنا كنا اخوات وحبايب ومصريين

ربنا يرحم شهداءنا ويغفر لموتانا جميعا
يتم النصر لينا يارب

اشكرك كريم على البوست الجميل

تحياتى لك

ملحوظة/
اضحكنى تعليقك عند شيرين فى موضوع كنت بهزر :)

دمت بخير

شمس العصارى يقول...

لولو : ازيك واهلا بيكى
ايام الثورة عدت لكن مكنتش زى الحلم
لا كان واقع وواقع صعب والاصعب منه التفكير فى الخطوات المستفبلية ونتايجها .... ولا اكبر المتفائلين كان يتوقع حدوث نصف النتائج

كل التقدير والتبجيل للشهداء
وكل التحية للمصابين
وكل الخير لمصر جميعا
ربنا يديم الابتسامة على وجهك دائما